Алдағы күндері Өскеменде көлік жолдарын орташа жөндеу жұмысы басталады. Қар еріп, жер арқасы кеңігенде қала көшелерінің ойлы-шұңқыр жолы көрініп, жүргізушілермен қоса жаяу адамдардың да ашу-ызасын туғызды. Жұрттың шағымына назар аударған жергілікті билік, жер дегди сала іске кіріспек, деп хабарлайды F16.kz.
Қала әкімдігінің мәліметінше, биыл 48 учаскеде орташа жөндеу жүргізу, 70 учаскеде қиыршық тас төсеу жоспарланған. Ең алдымен негізгі көшелер қолға алынады.
Атап айтқанда, жөндеу жұмыстары Әуезов даңғылы, Назарбаев даңғылы, Пермитин көшесі, Лихарев көшесі, Молдағұлова көшесі және Славский атындағы жағалау секілді қаладағы маңызды жол учаскелерін қамтиды.
Әкімдік өкілдерінің айтуынша, бұл жұмыс жол сапасын жақсартып, көлік қозғалысының қауіпсіздігін арттыруға бағытталған.
