Биыл су саласы қызметкерлерінің жалақысы 50%-ға артты. Бұл туралы Үкіметтің жылдық жұмыс қорытындысы баяндалған баспасөз мәслихатында айтылды, деп хабарлайды F16.kz.
Саланың тартымдылығын арттыру үшін Су ресурстары және ирригация министрлігі жалақыны көтеруге бағытталған кешенді шаралар қабылдады. Нәтижесінде, 2024 жылы «Қазсушар» РМК қызметкерлерінің жалақысы орта есеппен 25%-ға өссе, биыл 1 шілдеден бастап тағы 35-50%-ға артты.
Су ресурстары және ирригация министрі Нұржан Нұржігітов атап өткендей, қазір «Қазсушар» РМК қызметкерлерінің орташа жалақысы екі есе өсіп, 300 мың теңгеден асқан.
Сонымен қатар еңбек жағдайларын жақсарту шаралары аясында, биылдан бастап «Қазсушар» РМК-нің 425 маусымдық қызметкері тұрақты қызмет орындарына ауыстырылды.
Министр Нұржігітов Президент тапсырмасы аясында іске асырылып жатқан суармалы егіншілікті дамыту мәселесі туралы айтты. Оның есебінше, шаруашылықтарды суландыру ауыл шаруашылығы саласының әлеуетін арттыра түскен.,
2025 жылы 1,2 млн гектар ауыл шаруашылығы жерін суару үшін 11,1 текше км су пайдаланылды, оның 9,4 текше км-і «Қазсушар» РМК филиалдары арқылы қамтамасыз етілді, – деді министр.
Оның айтуынша, ауыл шаруашылығы құрылымында бұл су көлемі саланың жалпы ішкі өніміндегі үлесті 30%-ға дейін қамтамасыз еткен.
