Халықаралық бокс қауымдастығының (IBA) президенті Умар Кремлев аталған спортқа жаңашылдық енгізбек. Енді үздік былғары қолғап шеберлеріне «Оскар» сыйлығы табысталады, деп хабарлайды F16.kz порталы Vesti.kz—ке сілтеме жасап.
Ыстамбұлда (Түркия) өткен «IBA алтын дәуірі» баспасөз мәслихатында бұл тақырыпты ауыр салмақтағы әлемнің бұрынғы чемпионы Тайсон Фьюри (34-2-1, 24 КО) қозғады.
Бізде іс жүзінде ештеңе болған жоқ, ал қазір спортшылардың болашағы таңғаларлық екенін көріп отырмыз. Менің ойымша, бокстың болашағы зор. Бізде көптеген Олимпиада чемпионы бар, боксшылар көпшілік алдында өнер көрсетіп, елдің ықыласына бөленеді. Меніңше оларға «Оскар» беру керек. Бізге IBA-ға әлеуметтік профиль қалыптастыру керек. Мұнда өсіп, танымал боксшы болғысы келетіндерге мүмкіндік көп, – деді Фьюри.
Осыдан кейін IBA ұйымының басшысы боксшыларға арнап «Оскар» сыйлығы берілетінін мәлім етті.
Әлемнің үздік былғары қолғап шеберлеріне IBA «Оскар» табыстайды. Біз осыны енгіземіз. Міне, спортшылармен тікелей сөйлесіп, олардың сөзіне құлақ асу деген осы, – деді Кремлев.
Еске салайық, бүгін, 2 шілдеде Ыстамбұл қаласында IBA.PRO 7 шарасы өтеді. Бұл турнирде Қазақстанның екі өкілі — Милана Сафронова мен Михаил Коханчик бақ сынайды.
