Өскемен-Алтай-Катонқарағай-Рахман қайнары республикалық тас жолының бойында ерекше арт-нысан бой көтерді. «Алкоголь – жүргізушінің жауы» деген жазуы бар үлкен шыны шөлмек Алтай ауданының Северное ауылы маңына қойылған, деп хабарлайды F16.kz.
Жалпы биіктігі тоғыз метрге жететін алып бөтелкенің ішіне жол-көлік апатынан қатты зақымданған автокөліктер қойылған. Оларды көрген әрбір жүргізуші апаттың салдарын көзбен көріп, жауапкершіліктің маңыздылығын түсінеді.
Бұл арт-нысан – әрбір жүргізушіге рөлге тек сау күйде отырудың қаншалықты маңызды екенін, сонымен қатар жолда абай болудың қажеттілігін көрнекі түрде көрсетеді, — деп түсіндірді облыстық полиция департаментінің баспасөз қызметі.
Қала тұрғындары мен жүргізушілердің пікірінше, мұндай арт-нысан тек назар аударумен шектелмей, жолдағы жауапкершілікті сезінуге нақты әсер етеді.
