Қазақстан Республикасының Денсаулық сақтау министрлігі ақпан айын Қан тапсыру айы деп жариялады. Бұл бастама ерікті әрі өтеусіз донорлықты дамытуға, сондай-ақ қоғамда жауапкершілік, өзара көмек пен гуманизм құндылықтарын нығайтуға бағытталған, деп хабарлайды F16.kz.
Ведомствоның хабарлауынша, қан донорлығы – бір реттік акция ғана емес. Ол адам өмірін сақтауға, денсаулық сақтау жүйесін қолдауға және жанашырлық пен азаматтық жауапкершілікке негізделген тұрақты қоғамдық қозғалыс болып табылады.
Осыған орай ақпан айында еліміздің барлық өңірлерінде ақпараттық-түсіндіру шаралары, тақырыптық акциялар, донорлар мен серіктестердің қатысуымен кездесулер ұйымдастырылмақ. Сонымен қатар қан орталықтарында арнайы бағдарламалар өткізу жоспарланып отыр. Бұл іс-шараларға жастарды кеңінен тартуға ерекше мән беріледі.
Акция аясында әрбір азамат өз өңіріндегі қан орталығына барып, ерікті түрде қан тапсырып, игі іске үлес қоса алады.
Айта кетейік, Қазақстанда жыл сайын 180 мыңнан астам адам донор атанып, қан мен оның компоненттерін 250 мыңнан астам рет тапсырады. Жыл сайын 80 мыңнан астам науқасқа қан компоненттері құйылады, ал трансфузиялардың жалпы саны шамамен 400 мыңға жетеді.
