Өскеменнің «Торпедо» командасы Қазақстан тұрақты чемпионатының соңғы ойынында рудныйлық «Горняк» клубын жеңді. Тартысқа толы кездесудің жеңімпазы буллиттер сериясында анықталды, 1:0 есебімен өскемендік ұжым басым түсті.
Негізгі уақыт пен овертаймда жанкүйерлер жоғары деңгейдегі, тәртіпке құрылған ойынның куәсі болды. Қақпашылар Андрей Янков пен Владислав Нурек сенімді ойын өрнегін көрсетіп, қарсыластардың қауіпті соққыларына тосқауыл қойды. Шабуыл шебі бірнеше мәрте мүмкіндікке ие болғанымен, финалдық сиренаға дейін есеп ашылған жоқ.
Кездесу тағдыры буллиттер сериясында шешілді. Бұл сында өскемендік хоккейшілердің жүйкесі сыр бермеді. Шешуші соққыны Илья Кляузов сәтті орындады. Осылайша, «Торпедо» жанкүйерлеріне маңызды жеңіс сыйлап, тұрақты чемпионатты жеңімпен тәмамдады.
Қорытынды кесте бойынша өскемендік клуб Pro Hokei Ligasy турнирінде екінші орынды иеленді. Көш басында елордалық «Номад» хоккейшілері тұр.
Енді «Торпедоны» маусымның ең жауапты кезеңі — плей-офф бәсекесі күтіп тұр. Ширек финалда өскемендіктер атыраулық «Бейбарыс» командасымен кездеседі. Серияның алғашқы ойындары 24-ші және 26 ақпанда Өскеменде өтеді.
