Шығыс Қазақстан облысының Коршунов-Өскемен-1 (Өскемен-1 – Риддер учаскесі) бағытындағы темір жол бойында екі әйелді пойыз қағып кетті. Оның бірі алған жарақаттан оқиға орнында көз жұмды, екіншісі шұғыл түрде ауруханаға жеткізілді, деп хабарлайды F16.kz.
«Қазақстан темір жолы» ҰК» АҚ баспасөз қызметінің мәліметіне сүйенсек, оқыс оқиға бүгін, 22 тамызда сағат 10.20 шамасында болған.
Екі әйел адам темір жолға шыққан бойда пойыз машинисі қозғалысты тежеуге тырысқан. Алайда тоқтату мүмкін болмады. Оқыс оқиға салдарынан бір әйел сол жерде жан тапсырды, екіншісі бірден ауруханаға жеткізілді, — делінген баспасөз қызметінің хабарламасында.
«Қазақстан темір жолы» қаза тапқан әйелдің отбасы мен жақындарына көңіл айтты, зардап шеккен жанның тезірек сауығып кетуіне тілектестік білдірді.
Адамдар темір жол бойымен жүрген қауіпсіздік ережелерін қатаң сақтап, өте мұқият болғаны абзал, — деді компания өкілдері.
Шығыс Қазақстан облысы бойынша көлік полициясы департаментінің хабарлауынша, Өскемен стансасының желілік полиция бөлімі теміржол көлігін пайдалану немесе қозғалыс қауіпсіздігі ережелерін бұзу фактісі бойынша қылмыстық іс қозғаған. Аталған құқық бұзушылық абайсызда адам өліміне алып келген.
Қазіргі уақытта оқиғаның барлық мән-жайын анықтау үшін тергеу әрекеттері жүргізіліп жатыр, – деп хабарлады ведомствоның баспасөз қызметі.
