Шығыс Қазақстан облысы Шемонаиха ауданының екі тұрғынына Президент атынан «Күміс алқа» мемлекеттік наградасы салтанатты түрде табысталды, деп хабарлайды F16.kz.
Бұл марапат бала тәрбиелеуге және отбасылық құндылықтарды нығайтуға өз өмірін арнаған әйелдердің еңбегін мойындаудың айғағы ретінде берілді. Құрметті атаққа Алёна Ванина мен Анастасия Бизгеймер ие болды. Мемлекет басшысының атынан марапатты аудан әкімі Дидар Кенесбаев табыстап, аналардың еңбегін жоғары бағалады.
Алты баланы өмірге әкелген Алёна Ванина 2007 жылдан бері мәдениет саласында еңбек етіп келеді. 2016 жылдан бастап Усть-Таловка кентіндегі «Горняк» клубының директоры қызметін атқарады. Ол жастардың шығармашылық әлеуетін дамытуға зор үлес қосып, «Tutti Frutti» және «Декоратор» студияларына басшылық етеді. Сондай-ақ мәдени шараларды ұйымдастырып, елді мекеннің қоғамдық өміріне белсенді араласады. Алёна қызметпен бірге аналық міндетін де абыроймен атқарып, шаңырағының ұйытқысы болып отыр. Отбасында шынайы махаббат пен қамқорлықты сезініп, барынша қолдауға ие болған бұл үйдің балалары оқуда озат, спорт пен шығармашылықта жоғары жетістіктерге қол жеткізіп жүр.
Өзінің қоғамдық және кәсіби еңбегі үшін Алена «Жаңа Қазақстанның 100 жаңа есімі» белгісімен және көптеген алғыс хатпен марапатталған.
Анастасия Бизгеймер Шемонаиха ауданының Сугатовка ауылында тұрады. Ол да ауылдың қоғамдық өміріне белсенді атсалысып, ортақ іске жұмылудан ешқашан бас тартпайды. Күйеуі Павел екеуі – алты баланы тәрбиелеп отырған үлгілі ерлі-зайыптылар, туыстары мен ауылдастары арасында ерекше құрметке ие. Олардың балалары — еңбекқор, тәрбиелі және мектеп пен қоғам өміріне белсенді қатысатын жастар. Үлкен қызы Алина – бармен болып еңбек етіп, елдің алғысын арқалап жүрген талапты жас. Бұл үйдің басқа балалары да білім мен шығармашылыққа қызығушылық танытып, жоғары жетістіктерімен мақтана алады.
«Күміс алқа – бұл тек мемлекеттік марапат емес, сонымен бірге адам өмірінің маңызды миссиясы – келер ұрпақты тәрбиелеуге арнаған аналардың еңбегіне деген шынайы құрмет пен алғыстың белгісі.
