Шығыс Қазақстан облысының аумағында 18 қарашадан бастап республикалық «Қауіпсіз жол» жедел профилактикалық іс-шарасы өтіп жатыр. Тәртіп сақшылары екі күнде 300-ден астам құқықбұзушылықтың жолын кесті, деп хабарлайды F16.kz.
Профилактикалық шараның негізгі мақсаты — жол-көлік оқиғаларының алдын алу, жол қозғалысына қатысушылардың жауапкершілігін арттыру және жолаушылар тасымалына бақылауды күшейту.
«Қауіпсіз жол» шарасының алғашқы екі күнінде жол қозғалысы ережелерін бұзудың 360 фактісі анықталды. Оның ішінде, қарама қарсы жолаққа шығып кетудің 2 фактісі, көлік құралын масаң күйде басқарудың 1 фактісі тіркелді, — дейді ШҚО ПД баспасөз қызметі.
Тәртіп сақшылары көлік жүргізушілері мен жаяу жүргіншілерге жол жүру қағидаларын қатаң сақтауға шақырады.
Жедел профилактикалық іс-шара 23 қарашаға дейін жалғасады. Оның аясында облыс жолдарында бақылау күшейіп, рейд жүргізіледі.
