Өскеменнің автобус парктері жаңартылып жатыр. Күні кеше облыс орталығына YATONG маркалы су жаңа 12 автобус әкелді. Оның біреуі – экологиялық таза гибрид көлік. Қазір қаладағы автопарктер 70 пайыз жаңарды, деп хабарлайды F16.kz.
Қазақстанда құрастырылған бұл қоғамдық көліктерді жолаушы тасымалымен айналысатын «Vosca» ЖШС сатып алды. Олардың бәрі жоғары экологиялық стандарттарға (Евро-5) сай келеді, адамдарға жайлы болу үшін кең әрі заманауи талаптарға сай жабдықталған. Мүгедектігі бар адамдардың кіріп-шығуына ыңғайлы етіп пандус жасаған. Жолаушылар отыратын орындықтың жанында ұялы телефон қуаттайтын электр көзі орнатылған. Ал экологиялық жағынан таза көлік саналатын гибрид автобуста жазда салқындатып тұратын кондиционер бар.
«Vosca» ЖШС бас инженері Сергей Ильиннің айтуынша, мұндай көлік сағатына 30 шақырым жылдамдыққа дейін тек электр қуатымен қозғалады.
Гибрид көліктің бір артықшылығы кептелісте немесе бағдаршамда тұрғанда, ақырын жүрген кезде электр қуатын пайдаланады. Жылдамдықты сағатына 30 шақырымнан асырған кезде дизель қозғалтқыш іске қосылып, электр батареясы өздігінен қуат алады. Бұл бір жағынан жанармайға үнем болса, екінші жағынан және ең бастысы – ауаға бөлінетін түтін азаяды. Яғни экологиялық тұрғыдан таза, – деді бас инженер.
Өскемен әкімі Алмат Ақышовтың айтуынша, қалада қоғамдық көлік паркін жаңарту жұмысы кезең-кезеңімен жалғасып жатыр. Былтыр облыс орталығына 50 жаңа автобус жеткізілсе, биыл тағы 12-сі алынған. Сонымен қатар электробустар әкелінген. Алдағы уақытта қала біртіндеп электр көлікке көшеді. Бұл бағыттағы жұмыс тоқтамайды, басты мақсат – тұрғындарға қызмет көрсететін автобустардың барлығын жаңарту.
Бүгінгі таңда Өскеменнің автопарктері шамамен 65–70 пайызға жаңарды. Алдағы екі жылда бұл көрсеткішті 100 пайызға жеткізуді жоспарлап отырмыз. Бұл жұмысты барынша қарқынды жүргіземіз, – деді қала басшысы.
