Бүгін Өскеменде халықаралық стандарттарға сай жұмыс істейтін Бірыңғай көпсалалы ауыл шаруашылығы зертханасы ашылды, деп хабарлайды F16.kz.
Соның арқасында жергілікті өнімдер шетелдік нарыққа шығып, Шығыс Қазақстанның экологиялық таза әрі сапалы тауар өндіретін аймақ ретінде беделі нығая түспек. Кешен ғимаратына 800 млн теңгеден астам қаражатқа күрделі жөндеу жүргізіліп, Қытайдан әкелінген 66 зертханалық жабдық орнатылды. Нысан соңғы үлгідегі техникалармен жабдықталған. Онда ауыл шаруашылығы мен азық-түлік қауіпсіздігі салаларында диагностикалық, молекулалық зерттеулер жүргізуге мүмкіндік беретін заманауи құрал-жабдықтар бар. Зертханада иммуноферменттік талдау, полимеразалық тізбекті реакция (ПТР), оның ішінде нақты уақыт режиміндегі ПТР, бактериологиялық және вирусологиялық зерттеулер, тағам қауіпсіздігіне қатысты кешенді зерттеулер (пестицидтерге, ауыр металдарға, радионуклидтерге, нитраттарға, дәрілік қалдықтарға және т.б. талдау) жүргізіледі.
Зертхана Қытай Халық Республикасы мен Қазақстан арасындағы бірлескен бастаманың нәтижесінде құрылды. Бұл бастама өңірдің экспорттық әлеуетін арттыруға, ауыл шаруашылығы өнімдерінің сапасын бақылауды қамтамасыз етуге және ғылыми-зерттеу базасын нығайтуға бағытталған.
Кешеннің ашылу рәсімінде ветеринария қызметкерлеріне дезинфекциялық залалсыздандыру қондырғысы бар 13 «Газель» көлігі, мал тасымалдайтын алты арнайы техника мен бір инсинератор табысталды. Ветеринариялық және биологиялық қауіпсіздіктің заманауи талаптарына толық сәйкес келетін бұл көліктер елді мекендерде жылжымалы залалсыздандыру жұмыстарын жүргізеді.
Бұл жай ғана зертхана емес, екі елдің аграрлық секторына заманауи технологияларды енгізуге, бірлескен зерттеулер жүргізуге және білім алмасуға арналған стратегиялық платформа, – деді осы игілікті істің басы-қасында жүргендер.
Осы күні саланың өркендеуіне үлес қосқан еңбек адамдары марапатталды. «Ауыл шаруашылығы саласының үздігі» төсбелгісі облыстық жануарлар ауруларын диагностикалау зертханасының меңгерушісі Гүлшира Уранова, аға мал дерігері Венера Өмірзақова, Зайсан аудандық зертханасының мал дәрігері Гүлайым Ашекенова, Республикалық ветеринарлық зертхананың Күршім филиалының санитары Әлия Қабаеваға табысталды.
Біз аграрлар мен ветеринарлық қызмет мамандарын жүйелі түрде қолдаймыз. Бұл автокөліктер жай ғана көлік емес, ол – мамандар жұмысын тиімді етуге, еңбек жағдайын жақсартуға және өңірдің биологиялық қауіпсіздігін нығайтуға арналған құрал, — деп атап өтті ШҚО әкімі Нұрымбет Сақтағанов.
Бірыңғай көпфункционалды ауыл шаруашылығы зертханасының тұсаукесер рәсіміне өңір басшысымен бірге еліміздің ауыл шаруашылығы министрі, Қытай Халық Республикасының Қазақстандағы Төтенше және өкілетті елшісі, қытайлық делегация өкілдері және отандық ғылыми институттардың мамандары қатысты.
Жуырда мен «Altai Invest» инвестициялық форумына қатыстым, ал бүгінгі зертхананың ашылуы – Қытай мен Қазақстан арасындағы өзара іс-қимылдың тағы бір нақты дәлелі. Қытай елшілігі Шығыс Қазақстан облысының әкімдігімен және Ауыл шаруашылығы министрлігімен ынтымақтастықты одан әрі нығайтуға дайын, – деді Қытай елшісі.
