Елімізде балалар қауіпсіздігіне арналған «Абайлаңыз, балалар!» акциясы басталды, деп хабарлайды F16.kz.
Бұл туралы Ішкі істер министрлігі Әкімшілік полиция комитетінің төрағасы Қайсар Сұлтанбаев орталық коммуникациялар қызметі алаңында өткен баспасөз конференциясында мәлім етті. Оның айтуынша, акция биылғы 25 тамыз бен 10 қыркүйек аралығында өтеді. Шара барысында барлық аумақтық бөлімдер құқықтық ағарту жұмысын белсенді жүргізеді.
Қоғамдық орындарда, автобустарда, кинотеатрларда балалар қауіпсіздігіне арналған аудио және бейнероликтер көрсетіледі. Онда жаяу жүрген кезде жол ережелерін сақтау, балаларды тасымалдау кезінде қауіпсіздік құрылғыларын пайдалану және басқа да ережелер туралы айтылады, – деді Қайсар Сұлтанбаев.
