Қазақстанда мерзімді әскери қызметін өтеп жүрген сарбаздарға несие беру тәртібін қатаңдату жоспарланып отыр. Бұл норма Қаржы нарығын реттеу және дамыту агенттігі әзірлеген қаулы жобасында қарастырылған, деп хабарлайды F16.kz.
Құжат «Ашық НҚА» порталында жарияланды. Онда Қорғаныс министрлігі мен кредиттік бюролар арасындағы деректер алмасу тетігі нақты көрсетілген. Аталған мәліметтер әскерге шақырылған азаматтардың мәртебесін анықтау, қолданыстағы қарыздар бойынша төлемдерді кейінге шегеру және кредиттік тарихта олардың әскери қызмет өткеріп жатқаны немесе босатылғаны туралы ақпаратты белгілеу үшін пайдаланылмақ.
Жобаға сәйкес, банк пен микроқаржы ұйымдары несиеге өтінім түскен жағдайда шақыру жасындағы азаматтың мәртебесін міндетті түрде кредиттік есеп арқылы тексеруге тиіс. Егер азаматтың мерзімді әскери қызметте жүргені анықталса, қаржы ұйымдары оған несие бермеуі қажет.
Аталған қаулы жобасы 2026 жылғы 3 ақпанға дейін қоғамдық талқылауға шығарылды.
