Шығыс Қазақстан облысының әкімі Нұрымбет Сақтағанов белгілі ақыны, драматург, қоғам қайраткері, Қазақстанның Еңбек Ері, Халық жазушысы Мұхтар Шахановтың қайтыс болуына байланысты марқұмның отбасына, туған-туыстары мен жақындары, жалпы қазақ еліне қайғыра көңіл айтты. Бұл туралы ШҚО әкімінің баспасөз қызметі жазды, деп хабарлайды F16.kz.
Мұхтар Шаханов — көрнекті ақын, жазушы және қоғам қайраткері, 30-дан астам жыр жинағының авторы. Оның шығармашылығы мен азаматтық ұстанымы елдің рухани өмірінде терең із қалдырды. Ақын өз туындыларында халық тағдыры мен Қазақстанның болашағына қатысты маңызды мәселелерді көтерді. Тәуелсіздік жылдарында ол қазақ тілінің дамуы мен ұлттық құндылықтарды нығайту жолында белсенді еңбек етті. Жауапты мемлекеттік қызметтер атқарып, Парламент Мәжілісінің депутаты, Қазақстанның Қырғыз Республикасындағы Төтенше және Өкілетті Елшісі болып, ұзақ жылдар бойы «Жалын» журналын басқарды. Мұхтар Шаханов Қазақстан мен Қырғызстанның халық ақыны атақтарына ие болған. М.Шаханов артына мол рухани мұра қалдырды. Оның жарқын бейнесі халық жадында мәңгі сақталады, — делінген әкімнің көңіл айту жеделхатында.
Мұхтар Шаханов 1942 жылы 2 шілдеде қазіргі Түркістан облысының Төле би ауданы, Қасқасу ауылында дүниеге келген. Саналы ғұмырын қазақ әдебиеті мен мәдениетінің өркендеуіне арнаған қайраткердің шығармашылық мұрасы – бірнеше буынның рухани азығына айналды. Оның отты жырлары оқырманның жүрегіне жігер құйып, елдік пен ерлікті дәріптесе, өзі жазған және сөзіне жазылған лирикалық әрі патриоттық әндері халықтың сүйікті туындыларына айналып, сахна мен той-думанның сәнін келтірді.
Желтоқсан оқиғасы шындығын Кремль мінберінен әлемге паш еткен батыл тұлға ретінде Мұхтар Шаханов ел жадында мәңгі сақталады. Оның қайсар күрескерлік жолы Арал мен Балқаш тағдыры, ана тілінің мәртебесі, ел мен жерге қатысты өзекті мәселелермен тығыз сабақтасты.
Тәуелсіз Қазақстанның қалыптасуы мен нығаюына өлшеусіз үлес қосқан ол бауырлас қазақ пен қырғыз халықтарының арасындағы рухани байланысты бекемдеген бірегей тұлға. Марқұмның жарқын бейнесі мен өнегелі ғұмыры халық жадында мәңгі сақталады.
