Биылғы 23–24 сәуір күндері Тараздағы Көне Тараз тарихи-этномәдени кешені аумағында «Тараз – қолөнершілер қаласы» атты халықаралық қолөнершілер фестивалі ұйымдастырылады.
Ауқымды шараның басты мақсаты – өңірдің туристік әлеуетін арттыру, отандық шеберлерді халықаралық деңгейде таныту, сондай-ақ шетелдік және жергілікті қолөнершілер арасында тәжірибе алмасу мен ынтымақтастықты дамыту. Сонымен қатар фестиваль аясында ұмыт бола бастаған дәстүрлі қолөнер түрлерін сақтау және жаңғырту көзделген.
Фестивальге Қырғызстан, Өзбекстан, Тәжікстан елдерінен, сондай-ақ Алматы мен Түркістан өңірлерінен және жергілікті жерден 100-ден астам қолөнер шебері қатысады деп жоспарланып отыр.
Іс-шара барысында «Тараз – қолөнершілер қаласы. Дәстүр мен заманауи қолөнер» тақырыбында ғылыми-практикалық конференция өтеді. Сонымен қатар қолөнер бұйымдарының көрмесі, шеберлік сағаттары және «Менің әлемім: қиял мен шынайылық» атты жас шеберлер мен суретшілердің көрмесі ұйымдастырылады.
Бағдарламада бұдан бөлек «ASPARA FASHION WEEK» халықаралық сән апталығы, «Гиннес» рекордтар кітабына енген киіздің жанында өтетін «Dombyra Party», ұлттық киімдердің сән көрсетілімі мен өнер жұлдыздарының гала-концерті қамтылған.
Фестиваль қонақтарына көрмедегі бұйымдарды сатып алуға және Тараз қаласының тарихи-мәдени нысандарын аралауға мүмкіндік беріледі.
Ұйымдастырушылардың айтуынша, бұл күндері Тараз қаласы ұлттық дәстүр мен шығармашылық шабыт тоғысқан ерекше мәдени алаңға айналмақ.
