Шығыс Қазақстан облысында санитарлық талаптарға сай, қажетті инфрақұрылым жүргізілген ветеринарлық пункттер жетіспейді. Бұл туралы облыстық ветеринария басқармасының басшысы Рамиль Сағандықов айтты, деп хабарлайды F16.kz.
Бүгінгі таңда өңіріміздегі 99 ветеринарлық пункттің 38-і ғана жеке ғимаратта орналасқан. Ал қалғандары әкімдіктің, ауылшаруашылық құрылымдар мен жеке үйлерде орналасқан. Ветеринарлық пункттердің көбінде санитарлық жағдай нашар, жарық, жылу, су, интернет, жануарларды бекітуге арналған құрал-жабдықтар жоқ. Бұл ветеринарлық жұмыстардың тиімділігін төмендетіп, халықтың сеніміне кері әсер етеді, – деді бүгін өткен облыс әкімдігінің мәжілісінде Рамиль Сағандықов.
Басқарма басшысы бұл мәселені Жетісу және Жамбыл облыстарының тәжірибесіне сүйеніп шешуге болатынын айтты.
Аталған түйткілдің түйінін тарқатудың бір жолы бар, ол – Жамбыл, Жетісу облыстарындағы сияқты инфрақұрылыммен толық жабдықталған типтік ғимараттар салу, – деді ол.
