Бүгін футболдан Чемпиондар лигасының кезекті ойындары басталады. Алматының «Қайраты» сырт алаңда миландық «Интермен» ойнайды. Бұл матч қарашаның 5-інен 6-сына қараған түні болады, деп хабарлайды F16.kz.
«Интер» – «Қайрат» арасындағы ойын Астана уақытымен сағат 1.00-де басталады. Ойынды «Qazaqstan» телеарнасы тікелей эфирде көрсетеді.
Айта кетейік, «Интер» үш турдан кейін 9 ұпаймен көшбасшылар қатарында келе жатыр. Бұған дейін олар нидерландылық «Аякс» (2-0), чехиялық «Славия» (3-0) және бельгиялық «Юнион» (4-0) командаларын жеңіп, өз қақпасына бірде-бір гол жібермеді.
«Қайрат» клубы әзірге бір ұпайды қанағат тұтып отыр. Алматылық ұжым өткен турда кипрлік «Пафоспен» тең ойнады. Ал оның алдыңғы матчтарда португалиялық «Спортинг» (1-4) пен испаниялық «Реалдан» (0-5) жеңілген болатын.
