15-19 шілде аралығында Шығыс Қазақстан облысы аумағында «Жасөспірім» жедел профилактикалық іс-шарасы өткізілді, деп хабарлайды F16.kz.
Шараның басты мақсаты — кәмелетке толмағандар арасындағы құқықбұзушылықтардың алдын алу және жолын кесу, балалардың құқықтарын қорғау және олардың құқықтық сауаттылығын арттыру
ШҚО ПД баспасөз қызметі таратқан мәліметке сүйенсек, тәртіп сақшылары төрт күн ішінде есепке алынған 217 жасөспірім мен 251 заңды өкілдің тұрғылықты жеріне барып, тексеру жүргізді. Сондай-ақ рейд ұйымдастырылды. Нәтижесінде, 244 әкімшілік құқықбұзушылық анықталды.
Атап айтқанда, ҚР ӘҚБтК-нің 127-бабы (кәмелетке толмаған баланы тәрбиелеу жөніндегі міндеттерді, қауіпсіздігін қамтамасыз ету жөніндегі шараларды орындамау) бойынша 41 заңды өкіл жауапқа тартылды.
Ішімдік ішіп, масаң күйде жүрген 5 дерек және түнгі уақытта, яғни сағат 23:00-ден 06:00-ге дейін үлкендердің қарауынсыз үйден тыс жерде жүрген 190 жағдай тіркеліп, хаттама толтырылды, — дейді ШҚО ПД баспасөз қызметі.
Жедел алдын алу іс-шарасы алдағы уақытта да жалғасын табады. Полиция департаменті ата-аналарды балаларына жауапкершілікпен қарауға шақырады.
