«Жасыл даму» АҚ Қазақстан аумағында электронды қалдықтарды қайта өңдеу саласындағы жетекші компания болып табылатын «Technic Destroy» ЖШС инновациялық экологиялық жобасына қолдау көрсетуге ниетті. Бұл туралы Экология және табиғи ресурстар министрлігі мәлім етті, деп хабарлайды F16.kz.
2009 жылы құрылған «Technic Destroy» ЖШС – Қазақстандағы кеңселік және коммерциялық техниканың қалдықтарын қайта өңдеу саласында көшбасшы кәсіпорын. Компания литий-ионды батареяларды қайта өңдеу нарығында өз орнын тапқан және Орталық Азияда мамандандырылған өндіріс желісін енгізген алғашқы компания саналады. Былтыр кәсіпорын 3000 тоннадан астам батареялар мен электронды жабдықтарды қайта өңдеді.
Литий-ионды батареяларды қайта өңдеу желісінің жобалық өнімділігі –сағатына 300 кг, ал қайта өңделетін шикізаттың жалпы көлемі жылына 500 тоннадан асады.
«Жасыл даму» АҚ тарапынан көрсетілетін қолдау қоршаған ортаның ластану деңгейін едәуір төмендетіп, Қазақстанның «жасыл экономика» саласындағы әлеуетін нығайтуға мүмкіндік береді. Бұл жоба өңдеудің озық және экологиялық қауіпсіз технологияларын енгізуге бағытталған.
Фото: ШҚО өңірлік коммуникациялар қызметі
