Елімізде қайтарылған активтер қаражаты есебінен 318 млрд теңгеге 400-ден астам әлеуметтік нысан бой көтереді. Бұл бағытта Шығыс Қазақстан облысында да ауқымды жобалар жүзеге асырылып жатыр, деп хабарлайды F16.kz.
Президент Қасым-Жомарт Тоқаевтың тапсырмасына сәйкес мемлекет меншігіне қайтарылған активтер есебінен елімізде жүздеген әлеуметтік нысан құрылысы мен жаңғырту жұмыстары қолға алынған. Басты назар әлеуметтік маңызды инфрақұрылымға аударылды.
Қайтарылатын қаражат Қаржы министрлігінің жанынан құрылған Арнаулы мемлекеттік қорға түседі.
Бүгінде жалпы сомасы 318 млрд теңге болатын 406 жобаны қаржыландыру мақұлданды. Оның ішінде тоғыз білім беру нысаны, үш спорт саласындағы нысан, 162 денсаулық сақтау саласындағы жоба, 159 сумен жабдықтау жобасын қоса алғанда, 333 жоба іске асырылып жатыр.
Қайтарылған активтердің есебінен жүзеге асырылып жатқан ауқымды жобаның бірі – Өскемен қаласындағы Гематология орталығы. Медициналық мекемеде екі ғимарат болады: 148 орындық стационар және клиниканың пациенттеріне арналған 24 төсек-орындық қонақ үй.
Бас ғимаратта заманауи медициналық жабдықтармен жабдықталған зертхана, радиациялық диагностика, кардиология, кардиохирургия, гематология, сүйек кемігін трансплантациялау және күрделі соматика бөлімшелері жұмыс істейді. Жаңа Орталық науқастарға емдеудің және оңалтудың озық әдістеріне қол жеткізуге мүмкіндік береді.
Сонымен қатар қайтарылған активтер есебінен шығыста тағы сегіз жоба іске асырылып жатыр, оның екеуі денсаулық сақтау, алтауы сумен жабдықтау саласында жүзеге асырылады.
