Kaspi Bank қызмет көрсетуге жаңа комиссиялар енгізеді. Биылғы 31 наурыздан бастап қаржы институты Kaspi Gold картасы мен Kaspi Pay шоттары арқылы операция жүргізу ережелері мен тарифтерін жаңартады, деп хабарлайды F16.kz порталы «Бычий звоночек» телеграм арнасына сілтеме жасап.
Бұл өзгерістер жылдық қызмет көрсету құнына, аударымдар мен қолма-қол ақша шешу комиссияларына қатысты болмақ.
Kaspi Gold: жылдық қызмет – 10 000 теңге
2026 жылғы 31 наурыздан бастап
Kaspi Gold картасының жылдық қызмет көрсету құны – 10 000 теңге;
картаны қайта шығару – 10 000 теңге;
басқа банктердің картасына аударым – 5%;
белгіленген шектен асатын толықтыру немесе басқа біреуден түскен қаражаттан 5% комиссия ұсталады.
Өзін-өзі жұмыспен қамтығандарға бөлек шарттар енгізіледі. 2026 жылғы 10 мамырдан бастап 300 мың теңгеден асатын операцияларға 5% комиссия ұсталады.
Айта кетейік, бұған дейін аталған қызметтердің біразы тегін болған.
Kaspi Pay: бизнеске арналған жаңа тарифтер
2026 жылғы 31 наурыздан бастап:
Kaspi Pay шотын ашу – 15 000 теңге;
ай сайынғы қызмет көрсету – 15 000 теңге;
сыртқы аударымдар – әр төлем үшін 1 теңге;
қолма-қол ақша шешу комиссиясы 0,95%-дан 5%-ға дейін өседі.
Әсіресе қолма-қол ақша шешу үшін алынатын комиссияның өсуі кәсіпкерлер қалтасына әжептәуір салмақ салады.
Өзгерістер кімдерге әсер етеді?
Kaspi.kz көрсетілген тарифтер бойынша 100%-ға дейін жеңілдік жасау құқығын сақтайды. Яғни кейбір клиенттерге бұрынғы жеңілдетілген шарттар сақталуы ықтимал. Мәселен, белсенді және адал клиенттерге, жалақы жобаларына қатысушыларға және банктің ішкі бағдарламаларына қосылғандарға жеңілдіктер қарастырылуы мүмкін.
Kaspi.kz ұзақ уақыт бойы тегін қызмет көрсету моделін ұстанып келген еді. Тарифтердің қайта қаралуы банк комиссияларының классикалық жүйесіне көшу белгісі болуы мүмкін. Енді клиенттер қаржылық әдеттерін қайта қарап, аударым көлемін бағалап, өз санаты бойынша жеңілдіктердің сақталатынын алдын ала анықтап алғаны абзал.
