Ұлан ауданы Қасым Қайсенов кентінде су құбыры желілерін қайта жаңғырту жобасы жүзеге асырылып жатыр. Нысанның құрылысы 2024 жылғы қараша айында басталған, деп хабарлайды F16.kz.
Жобаның негізгі мақсаты – кент тұрғындарын сапалы ауыз сумен қамтамасыз етіп, қолданыстағы сумен жабдықтау жүйесінің тұрақтылығын арттыру.
Жоба аясында «Өскемен Водоканал» мемлекеттік коммуналдық кәсіпорнының Ново-Усть-Каменогорск су жинау орнынан магистральдық су құбырын тарту көзделген. Қазіргі уақытта 13 шақырымға жуық магистральдық және 7 шақырымға жуық кентішілік су құбыры желілері төселді.
Су жинау құрылыстары да жалғасып жатыр. Бүгінде жалпы сыйымдылығы 1 900 куб метр болатын екі таза су резервуарының құрылысы аяқталған. Екінші көтерілімдегі сорғы станциясы салынып жатыр. Құрылыс жұмыстарына 12 бірлік арнайы техника және 30 маман жұмылдырылған. Жұмыстардың белгіленген мерзімде әрі сапалы орындалуы қадағаланады. Сонымен бірге құрылыс барысында бұзылған аумақтарды қалпына келтіру және абаттандыру мәселелері де қатаң бақылауға алынған, — дейді аудан әкімдігінің өкілдері.
Жоба жоспар бойынша қыркүйек айында аяқталуға тиіс.
Аталған жоба Қасым Қайсенов кентінің тұрғындарын сапалы әрі тұрақты ауыз сумен қамтамасыз етуге мүмкіндік береді.
