Қазақстан Президенті Қасым-Жомарт Тоқаев пен Өзбекстан басшысы Шавкат Мирзиёев Бұхара қаласындағы Бахауддин Нақышбанди мемориалдық кешеніне барды, деп хабарлайды F16.kz порталы Ақордаға сілтеме жасап.
Мемлекет басшысының Өзбекстанға жұмыс сапары көне шаһар Бұхарадағы тарихи-рухани нысанға зиярат етуден басталды. Қос елдің президенттері алдымен мемориалдық кешеннің аумағын аралап, оның құрамына кіретін медресе, екі мешіт және биік мұнарамен танысты. Сол жерде кешеннің сәулеті мен тарихи маңызы туралы жан-жақты мәлімет берілді.
Зиярат рәсімі барысында құран оқылып, Қазақстан мен Өзбекстан халықтарына бейбіт өмір, ынтымақ пен бақ-береке тіленді. Мемлекет басшылары қасиетті орынға келген жұртшылықпен жылы жүздесіп, сөйлесіп, естелік суретке түсті. Бұл кездесулер бауырлас екі ел арасындағы рухани және мәдени байланыстың тереңдігін айшықтай түсті.
Айта кетейік, аталған кешен – Бахауддин Нақышбанди негізін қалаған Нақышбандия сопылық тариқатының аса ірі рухани орталығы саналады. Оның кесенесі XVI ғасырда тұрғызылған және бүгінгі күнге дейін Орталық Азиядағы маңызды зиярат орындарының бірі ретінде сақталып келеді.
Мемориалдық кешен аумағында орналасқан музейде бірегей тарихи мұралар қойылған. Атап айтқанда, XIX ғасырға тиесілі Құран Кәрім қолжазбалары, сирек кездесетін тарихи құжаттар, көне кітаптар мен басқа да құнды жәдігерлер сақталған. Бұл экспонаттар аймақтың бай рухани-мәдени тарихынан сыр шертеді.
Жалпы, бұл сапар Қазақстан мен Өзбекстан арасындағы стратегиялық серіктестікті нығайтуға, сондай-ақ ортақ тарихи және рухани құндылықтарды дәріптеуге бағытталған маңызды қадамдардың бірі болды.
