Катонқарағай мемлекеттік ұлттық табиғи паркінде қоңыр аюлар қысқы ұйқыдан оянып, белсенді тіршілікке көшті. Түз тағысының әрекеті фототұзаққа түсіп қалды, деп хабарлайды F16.kz.
Фототұзақты орманшы Жомарт Аманбаев бұғылар жүретін аймаққа орнатқан. Көп ұзамай камераға қысқы ұйқыдан тұрып, қорек іздеп жүрген аю түскен.
Мамандардың айтуынша, көктем — жабайы жануарларға ең қиын кезеңнің бірі. Алты ай қыста азықсыз жатқан аңдар әлсіреп, қорекке мұқтаж болады. Сондықтан ұлттық парк қызметкерлері жануарларға арнайы минералды қорек орындарын дайындайды. Орман ішіне тұз және басқа да түрлі қоспалар қойып, жануарлардың жылдам тыңаюына жағдай жасайды. Мұндай шаралар, әсіресе көктемнің басында маңызды, себебі бұл уақытта табиғи қорек әлі жеткіліксіз болады.
Ұлттық парк аумағында жабайы жануарларды бақылау және оларға қолдау көрсету жұмысы жалғасады.
