Халықаралық Азаматтық авиация ұйымы (ICAO) 2025 жылғы 30 тамыздан 15 қыркүйекке дейін Қазақстан Республикасында өткізілген авиациялық қауіпсіздіктің кешенді аудитінің (USAP-CMA) нәтижелерін ресми түрде жариялады, деп хабарлайды F16.kz тілшісі Көлік министрлігіне сілтеме жасап.
– Тексеру қорытындысы бойынша Қазақстан Республикасындағы ICAO халықаралық стандарттарына сәйкестік деңгейі 95,7%-ға жетті. Бұл көрсеткіш әлемдік орташа деңгейден (72,01) және Еуропа елдерінің көрсеткішінен (87,92%) де жоғары, – деп жазады дерек көзі.
Қазақстанның нәтижесі ТМД елдері мен ICAO-ның Еуро-Азиялық (EUR/NAT) аймағы бойынша ең жоғары көрсеткіштердің бірі болып табылады. Салыстырмалы түрде:
- Әзербайжан – 74,66%;
- Өзбекстан – 85,47%;
- Қырғызстан – 85,76%;
- Грузия – 89,75%;
- Беларусь – 91,85%;
- Ресей – 94,14%.
Белгілі болғандай, таяу өңірлерде Қазақстанның көрсеткіштеріне жақын нәтижелер бірнеше елде ғана бар екен. Олардың арасынан Біріккен Араб Әмірліктері (98,4%), Катар (96,72%) мен Сауд Арабиясын (94,41%) атап өтуге болады.
Көлік министрлігінен хабарлағандай, Қазақстанның авиациялық қауіпсіздік бойынша алдыңғы көрсеткіші 83% шамасында болатын.
