Елімізде тағы бір мемлекеттік мереке пайда болуы мүмкін, деп хабарлайды F16.kz тілшісі Digital Business сайтына сілтеме жасап.
Қазақстанда 1 маусым, яғни балаларды қорғау күнін мемлекеттік мереке етіп белгілеу ұсынылып отыр. Бұл туралы Мәжіліс депутаты Кенжеғұл Сейтжанның Еңбек және халықты әлеуметтік қорғау министрлігіне жолдаған депутаттық сауалына берілген жауапта айтылған.
Депутат өз сауалында балаларды «стратегиялық ресурс» деп атап, олардың дамуына жағдай жасау күн тәртібіндегі мәселе екенін жеткізді.
– Балалардың қауіпсіздігі, денсаулығы және жан-жақты дамуы. Міне, осы бағыттарды мемлекеттік саясаттың басым бағыттары ретінде қарастыруымыз керек, – деді К.Сейтжан.
Еңбек және халықты әлеуметтік қорғау министрлігі бұл бастаманы қолдап отыр. Ведомстводағылар мереке күні ата-аналар мен балалардың бірге уақыт өткізуінің маңызы зор екенін айтуда.
– Атаулы мереке ата-аналар мен балаларға бірге уақыт өткізуге мүмкіндік береді… Бұл баланың өзін қауіпсіз сезінуіне, отбасы құндылықтарын терең ұғынуына ықпал етеді, – деп түсіндірді министрліктен.
Аталмыш мәселе бойынша шешімді Үкімет пен Парламент қабылдайды. Егер ұсыныс қолдау тапса, 1 маусым еліміздегі тағы бір ресми демалыс күніне айналмақ.
