Еліміздегі үш негізгі байланыс операторы – Altel, Beeline және Tele2 осындай шешім қабылдады. Бұны олар жоспарлы баға саясатымен байланыстырып отыр, деп хабарлайды F16.kz.
Tele2 мен Altel биылғы 25 желтоқсанынан бастап абоненттік төлем мен тариф қызметтерінің көлемі өзгеретінін мәлімдеді. Аталған компаниялар мұндай қадамға баруға желіні дамыту, жаңарту жұмыстарының жүргізілуі және қызмет көрсету шығынының өсуі, сондай-ақ салық заңнамасындағы өзгерістер себеп болғанын атап өтті.
Абоненттік төлемнің өзгеруі байланыс сапасын жақсарту мен қызмет тұрақтылығын қамтамасыз етуге көмектеседі. Сондай-ақ кейбір тарифтік жоспарларда қосымша ресурстар мен QINO қызметін ұсынамыз, – делінген Tele2 хабарламасында.
Ескерте кетейік, ұялы байланыс тарифтеріне қатысты толық ақпарат тұтынушыларға SMS арқылы қосымша жолданады.
Beeline компаниясы келер жылы 1 қаңтардан бастап кейбір қызметтердің бағасы өсетінін жеткізді. Яғни, 2026 жылдан бастап Қазақстанда қосымша құн салығы мөлшерлемесінің өзгеруі байланыс қызметінің, интернеттің және қосымша сервистердің бағасына әсер етпек.
Сол себепті тариф жоспарлары бойынша абоненттік төлемдер қайта қаралады. Жаңа тариф туралы тұтынушыларға өзгерістер күшіне енгенге дейін кемінде 30 күнтізбелік күн бұрын хабарланады.
