Қазақстандағы атом электр стансасының құрылыс жұмыстарын франциялық Assystem компаниясының мамандары қадағаламақ, деп хабарлайды F16.kz
Әлемдегі жетекші компанияның бірі
Бұдан былай ядролық инжиниринг саласындағы әлемдегі жетекші тәуелсіз компаниялардың бірінен саналатын Assystem «Қазақстандық атом электр станциялары» ЖШС-нің (ҚАЭС) техникалық кеңесшісі міндетін атқарады.
Дәлірек атсақ, француз мамандары еліміздегі АЭС жобасын іске асыру барысындағы инжиниринг, жобаны басқару және құрылыс жұмыстарын кешенді қадағалау жұмыстарына жауапты болады.
Түркия мен Өзбекстандағы жобаларға қатысқан
60 жылдық тарихы бар франциялық компания атом энергетикасын дамыта бастаған көптеген елдегі жобаларды жүзе асыруға қатысқан. Оның ішінде Біріккен Араб Әмірліктері, Сауд Арабиясы, Түркия мен Өзбекстандағы жобалар бар.
Бүгінде сегіз мыңнан астам жұмысшысы бар компания халықаралық атом энергетикасы саласында теңдесі жоқ тәжірибеге ие. Сонымен қатар, Assystem Франция мен Ұлыбританияның ұлттық атом бағдарламаларын үйлестіруде жетекші орын алатыны айту керек.
Қолжетімді әрі төмен көміртекті энергиямен қамтамасыз ету мақсатында компания төмен көміртекті генерацияны (атомдық және жаңартылатын энергетика, электр желілері) және таза сутекті дамыту бағыттарын белсенді ілгерілетіп жатыр.
Қауіпсіздік – басты мақсат
Негізі, еліміз аталмыш компаниямен әріптестікті 2022 жылы бастаған. Ол кезде Assystem компаниясы мен «Самұрық-Қазына» ұлттық әл-ауқат қоры арасында ынтымақтастық туралы меморандумға қол қойылған болатын.
Енді француздар елімізде атом энергетикасы саласының мамандарын даярлауға қатысып, АЭС салу кезінде техникалық консультация ұсынады.
Еске салайық, Қазақстанда атом энергетикасын дамыту «Қазақстан-2050» стратегиясының бір бөлігі болып табылады. Оның мақсаты қазіргі уақытта энергетика саласындағы шамамен 70%-ға жететін көмір мен мұнайға тәуелділікті азайтып, баламалы көздерден электр энергиясын өндіру үлесін 50%-ға дейін жеткізу.
– Қазақстанмен оның жаңа атом энергетикалық бағдарламасы аясында ынтымақтастық орнатқанымызға қуаныштымыз. Assystem командасы осындай маңызды бағдарламаның АЭХА және ҚАЭС талаптарына сай қауіпсіз әрі тиімді жүзеге асырылуына ерекше назар аударатын болады, – дейді Assystem Group Бас директорының орынбасары Стефан Обарбье.
