ҚР Қорғаныс министрлігі Армия орталық спорт клубының спортшысы, қатардағы жауынгер Қадырбек Шынбаев 70 келіден жоғары салмақта ересектер арасында аралас жекпе-жектен Азия чемпионатының алтын медалін жеңіп алды, деп хабарлайды F16.kz.
Қытай Халық Республикасының Сычуань провинциясы, Лучжоу қаласында өткен дүбірлі додаға 19 елден 200-ге жуық спортшы қатысты. Қазақстандық спортшы бұл сында Моңғолия, Қытай, Қырғызстан және Тәжікстанның өкілдерімен күш сынасып, олардың бәрін сенімді түрде жеңді.
Қарсыластарым мықты болды. Тәжірибелері де жеткілкті. Әр жекпе-жек ерік-жігер мен күш-қуатты талап етті. Әйтсе де, жеңіс тұғырынан көрініп, көк байрағымызды желбірету үлкен абырой болды, – деді чемпион.
Қадырбек Шынбаевтың халықаралық арендағы бұл жетістігі әскери спорттың жоғары әлеуетін тағы бір дәлелдеді. Бұл турнирде үздік шыққандар алдағы Азия ойындарына қатысуға мүмкіндік алады. Айта кетейік, Сары құрлық бәсекесінің жарыс бағдарламасына ММА алғаш рет енгізіліп отыр.
