Еліміздің Қаржы нарығын реттеу және дамыту агенттігінің мәліметіне сүйенсек, жыл басынан бері атына 10 немесе одан да көп банк картасын ашқан клиенттер саны 11 есе кеміген, деп хабарлайды F16.kz.
Мұндай шаралар ақша жылыстату мен қаржылық алаяқтықпен күресу мақсатында қолға алынып отыр. Өйткені кейінгі жылдары дропперлер, яғни алаяқтық жолмен қаржы айналымына көмектесетін делдалдар банк карталарын белсенді пайдалана бастаған. Мұндай адамдар көбіне өз атына бірнеше карта ашып, оларды қылмыстық топтарға сатады немесе жалға береді. Бұл қаржы жүйесіне қауіп төндіреді.
Қаржы нарығын реттеу және дамыту агенттігінің хабарлауынша, жыл басынан бері атына 10 немесе одан да көп карта ашылған клиенттер саны 9 957-ден 876-ға дейін қысқарған. Ал шетел азаматтары арасында мұндай картасы бар адамдар 235-тен 4-ке дейін азайған.
Кейінгі жылдары елімізде банк карталарының саны тым көбейіп кетті. Оған себеп: олардың қолжетімділігі, кэшбэк мүмкіндіктерінің болуы, сондай-ақ қылмыстық схемаларда қолданылу. Мәселен, бір адамның атына 500 картаға дейін рәсімделген жағдайлар бар.
Осы орайда бесеуден көп картасы бар клиенттерге шектеу мен күшейтілген тексеру енгізілді. Ал Қазақстан банктері бір адамға 4-5 картадан артық бермеуге шешім қабылдады. Кейбіреулері тіпті бір адамға бір ғана картамен (Kaspi, нерезиденттерге) шектеледі.
