2025 жылды қорытындылау мақсатында еліміздің барлық өңірін қамтыған, 1000 респондент қатысқан жалпыұлттық әлеуметтанулық сауалнама жүргізілді.
Зерттеу нәтижелері азаматтардың өткен жылды жалпы оң бағалағанын көрсетті. Жаһандық тұрақсыздық жағдайында бұл қоғамның өзгерістерге бейімделу деңгейінің жоғары екенін аңғартады.
Тұрақтылық пен жеке жетістіктер жылы
«2025 жыл сіз үшін қандай жыл болды?» деген сұраққа жауап бергендердің тек 11%-ы жылды сәтсіз деп бағаласа, 37%-ы оны табысты кезең ретінде атаған. Ал респонденттердің 52%-ы жылды айқын оң немесе теріс үрдістер байқалмаған, жалпы тұрақты кезең деп сипаттаған. Теріс пікірлерге қарағанда оң баға бергендер 3,5 есе басым болды.
Есте қалған оқиғалар
Сауалнамаға қатысушылар 2025 жылдың басты жетістіктері ретінде спорт, технологиялар мен цифрландыру, киноиндустрияны дамыту, өнеркәсіп, сондай-ақ мектептер, ауруханалар және өзге де әлеуметтік нысандардың салынуын атады.
Ең жарқын әрі жағымды оқиғалар қатарында:
- «Қайрат» – «Реал Мадрид» арасындағы матч және өзге де спорттағы жетістіктер.
- Әлемдік деңгейдегі жұлдыздардың концерті мен мерейтойлық шаралар;
- Жаңа әлеуметтік нысандардың ашылуы және инфрақұрылымды жақсарту;
- Жасанды интеллект саласындағы ірі жетістіктер;
- Президенттің халықаралық деңгейдегі кездесулері аталды.
Ел дамуына қатысты қоғамдық пікір
Зерттеу нәтижесіне сәйкес, қазақстандықтардың 71%-ы елдің дұрыс бағытта дамып келе жатқанын атап өткен. Сонымен қатар, респонденттердің 77%-ы Президенттің қызметін қолдайтынын білдірді. Бұл деректер қоғамда елдің даму бағытына қатысты ортақ көзқарас қалыптасқанын көрсетеді.
