Бүгін Өскемендегі «Казцинк» кәсіпорында болған жарылысқа байланысты ҚР Премьер министрі Олжас Бектеновтың тапсырмасымен жедел штаб отырысы өтті. Оған Шығыс Қазақстан облысының әкімі Нұрымбет Сақтағанов төрағалық етті, деп хабарлайды F16.kz.
Аймақ басшысы өз сөзінде үйінді астында қалған зардап шеккендерді іздеу жұмыстарын жалғастырып, апат толық жойылғанға дейін ТЖД қызметкерлерінің сол жерде болуы қажеттігін жеткізді. Ал жарылыстың нақты себебін анықтау үшін ведомствоаралық комиссия құрылады.
Мемлекеттік еңбек инспекциясы комитетінің Шығыс Қазақстан облысы бойынша департаменті жазатайым оқиғаны тергеу үшін арнайы комиссия құруға тиіс. Облыстық экология департаменті апатты жою штабы жұмыс істеген кезеңде атмосфералық ауа сапасына үздіксіз экологиялық мониторинг жүргізсін. Қаза болғандар мен зардап шеккендердің отбасыларына психологиялық және материалдық көмек көрсетіледі, — деді Нұрымбет Сақтағанов.
Өндірістік циклдің одан әрі жұмыс істеу мүмкіндігін бағалау бойынша тиісті шаралар қабылданады. Сондай-ақ кәсіпорындағы қауіпсіздік техникасының сақталуына бақылау күшейтіледі. Жағдай облыс әкімінің жеке бақылауында.
