Шығыс Қазақстан облысында 234 елді мекен интернетпен қамтамасыз етілген. Ал, Күршім ауданы халқының 83,7 пайызы сапалы интернетке қосылып отыр, деп хабарлайды F16.kz.
Бүгін облыс әкімі Нұрымбет Сақтағанов жұмыс сапарымен Күршім ауданына барды. Тұрғындармен кездесу барысында көтерілген өзекті мәселенің бірі — байланыс пен ғаламтордың жоқтығы.
Күршім ауданына қарасты 10 ауылда, атап айтқанда Бурабай, Теректібұлақ, Топтерек, Ақши, Егіндібұлақ, Қыстаукүршім, Қайнар, Жолнұсқау, Үшбұлақ және Қаратоғай ауылдарында интернет сапасы сын көтермей тұр. Бүгінде онда барлығы 2500-ге жуық халық тұрады.
Бұл мәселені шешу үшін биыл төрт антенна-мачталық құрылғы орнатылған.
Әлеуметтік нысандарға ерекше көңіл бөлініп жатыр. Қазіргі уақытта ауданның 18 мектебін жоғары жылдамдықты интернетпен қамтамасыз ету үшін «Starlink» жабдығы орнатылды. Ал, байланыс нашар ауылдар 2027 жылға дейін сапалы интернетке қосылады, – деді аймақ басшысы.
Облыс әкімі өз сөзінде 2027 жылдың соңына дейін облыстағы тағы 123 елді мекенге интернет тартылатынын атап өтті.
