Шығыс Қазақстан облысының құтқарушылары қар көшкіні жағдайында іздестіру-құтқару жұмыстары бойынша тактикалық-арнайы оқу-жаттығулар өткізді, деп хабарлайды F16.kz.
Оқу-жаттығу сценарийі бойынша таудан сырғанақ теуіп жүрген шаңғышы қар көшкінің астында қалып қойған. Көмекке келген құтқарушылар кинологиялық есепке жүгіне отырып арнайы құралдардың көмегімен зардап шегушіні тауып, оны қалың қардың астынан шығарып алды. Жедел әрекет ету үшін қарда жүретін көліктер (снегоходтар) пайдаланылды.
Мұндай оқу-жаттығуларды өткізу, әсіресе күрделі тау бедері жағдайында, құтқару бөлімшелерінің көшкінге ден қоюға дайындығын арттыруға бағытталған.
Айта кету керек, Шығыс Қазақстан облысы елдегі көшкін қаупі неғұрлым жоғары облыстардың бірінен саналады. Қазір өңірде 325 қар көшкіні қаупі бар аймақ бар, бұл жерлерде 93 км автокөлік жолы, туристік және шаңғы базалары бар.
Төтенше жағдайлар қызметі тұрғындарға тауға шығар алдында міндетті түрде ауа райы жағдайын білу қажеттігін ескертеді. 112 қызметінен дауыл ескертулері хабарланса тәуекелге баруға және көшкін қаупі бар аумақтарға шығуға болмайды.
