Қыс мезгілінде өңірдегі республикалық автожолдарда көлік қозғалысы 49 рет шектелген. Бұл туралы «ҚазАвтоЖол» ҰК Шығыс Қазақстандағы филиалы мәлім етті, деп хабарлайды F16.kz.
Жергілікті «Қажсервис» ЖШС филиалының дерегіне сүйенсек, биылғы маусымда қатты жел, қарлы боран мен көктайғақ жол қозғалысын айтарлықтай қиындатқан.
Биыл қыста республикалық трассаларда 49 рет қозғалыс толық жабылып, 47 рет көліктің жекелеген түрлеріне шектеу енгізілді. Боран күндері қауіпті учаскелерден 30 мыңға жуық көлікті ілестіріп өткізді. Қар құрсауында қалған жүздеген жүргізуші құтқарылды. Тұрғындардың қауіпсіздігін қамтамасыз ету үшін жолдарда тәулік бойы 120-дан астам адам мен 100-ден аса арнайы техника жұмыс істеді, — деп атап өтті «Қажсервис» ЖШС ШҚО филиалының бас инженері Шыңғыс Заитов.
Жолшылар, әсіресе қолайсыз ауа райына байланысты жиі жабылатын күрделі учаскелерге ерекше назар аударды. Бұл жерлерде тұрақты түрде қар күреу және көліктерді жедел эвакуациялау жүргізілді.
Қысқы күтіп-ұстау сапасына бақылауды «Жол активтерінің ұлттық сапа орталығы» мамандары жүзеге асырды. Маусым барысында олар 13 рет көшпелі тексеру өткізген.
Тексеру барысында анықталған барлық ескертулер, яғни жолдағы мұз қабаты, ойықтар, қардан толық тазаланбаған жол белгілері жедел түрде жойылды, — деді «Жол активтері сапасының ұлттық орталығы» РМК ШҚО филиалы бөлімінің басшысы Саяхат Мұсапыров.
