Елімізде мал бордақылайтындарға жеңілдетілген несие беріледі. Ауыл шаруашылығы министрлігі Аграрлық несие корпорациясымен бірлесіп арнайы бағдарламаны іске қосты, деп хабарлайды F16.kz.
Ауыл шаруашылығы министрлігінің мәлімдеуінше, биылға белгіленген қаржыландырудың жалпы көлемі шамамен 50 млрд теңге болады. Бағдарламаның негізгі мақсаты – айналым қаражатын толықтыру үшін жеңілдетілген шарттармен несие беру арқылы ірі қара және ұсақ малға арналған бордақылау алаңдарын қолдау. Қаржыландыру шарттарына келсек, несие мерзімі – 12 айға дейін, сыйақы мөлшерлемесі – 5% (жылдық).
Бағдарламаға негізінен ірі қара мен ұсақ мал бордақылайтын, тиісті өндірістік инфрақұрылымы бар кәсіпорындар қатыса алады. Жобаларға қойылатын талаптардың бірі – семірген малдың кемінде 50%-ын отандық ет өңдеу кәсіпорындарына өткізу.
Кеңес алу және қаржыландыруға өтінім беру үшін «Аграрлық несие корпорациясы» АҚ-ның жақын жердегі өңірлік филиалына жүгіну қажет. Қосымша ақпаратты Agrocredit.kz сайтынан немесе 5353 call-орталығы нөмірі арқылы алуға болады.
