Маңғыстауда әкімнің орынбасарлары есірткі қылмысына қатысы бар деген күдікпен ұсталды, деп хабарлайды F16.kz.
Облыс әкімдігінің мәлімдеуінше, жергілікті биліктің көмегімен полиция департаментінің қызметкерлері Мұнайлы ауданының үш тұрғынын қолға түсірді. Олардың екеуі шенеунік болып шықты: Мұнайлы ауданы әкімінің орынбасары мен Атамекен ауылдық округі әкімінің орынбасары.
Бұл дерек бойынша сотқа дейінгі тергеу басталды. Аудан әкімінің орынбасары уақытша ұстау изоляторына қамалды. Ал өзге күдіктілерге қатысты бұлтартпау шарасы қарастырылып жатыр. Айғақты заттар сараптамаға жіберіліп, қажетті тергеу жүргізіліп жатыр, – деп хабарлады Маңғыстау облысы әкімдігі.
Заң бұзған күдіктілер есірткі бизнесіне қарсы «Қарасора-2025» рейді аясында ұсталғанын айта кету керек.
