ШҚО-да «Мемлекеттік қызметтегі әйел көшбасшылар» атты электронды альбомның тұсауы кесілді. Бұл ерекше туындыда мемлекеттік қызметтің және өңірдің дамуына үлес қосқан әйелдердің өмір жолы мен еңбегі жинақталған, деп хабарлайды F16.kz.
Жобаны іске асыруға ҚР Президенті жанындағы Мемлекеттік басқару академиясының ШҚО филиалы мен Мемлекеттік қызмет істері агенттігінің ШҚО бойынша департаменті бастамашы болған. Альбомда мемлекеттік басқару жүйесінде еңбек етіп жүрген әйелдердің кәсіби жетістіктері, тәжірибесі және өмір жолы көрсетілген. Мұндағы негізгі мақсат — әйелдердің мемлекеттік қызметтегі рөлін насихаттап, гендерлік теңдікті нығайтуға және әйелдер көшбасшылығын қолдауға бағытталған.
Ресми деректерге сүйенсек, бүгінде өңірде 3964 адам мемлекеттік қызметте жұмыс істесе, оның шамамен 70 пайызы – әйелдер. Соның ішінде 474 әйел басшылық лауазымда қызмет атқарады.
Электронды альбомда мемлекеттік қызметке өз өмірін арнаған әйелдердің еңбек жолын көрсетуге тырыстық. Жинаққа бес бөлім, яғни «Мемлекеттік қызмет ардагерлері», «Көшбасшы әйелдер», «Мәслихаттағы іскер әйелдер», «Мемлекеттік қызметтегі көпбалалы аналар»,«Белсенді қызметкер әрі ана» бойынша қала-аудандардан 101 әйелді таңдап, енгіздік, — деп атап өтті Мемлекеттік басқару академиясы филиалының доценті Айгүл Сейілхан.
Ұйымдастырушылардың айтуынша, электронды альбом болашақта баспа нұсқасында да жарық көрмек.
