Қазақстанда автокөліктің мемлекеттік тіркеу нөмірі талапқа сай болмаған жағдайда жүргізуші әкімшілік жауапкершілікке тартылады. Атап айтқанда, нөмірдің лас болуы, анық көрінбеуі немесе дұрыс орнатылмауы айыппұл салуға негіз болады, деп хабарлайды F16.kz.
Кейбір жағдайларда бұл құқықбұзушылық жүргізуші куәлігінен уақытша айырылуға дейін апаруы мүмкін.
«ҚазАвтоЖол» ұлттық компаниясының мәліметінше, мемлекеттік нөмір көлікті сәйкестендіретін негізгі белгі болып саналады және ол кез келген уақытта оңай оқылуға тиіс. Осыған байланысты жүргізуші нөмірдің таза әрі стандарт талаптарына сәйкес орнатылғанын қадағалауға міндетті.
Сонымен қатар мемлекеттік нөмірді оқуға кедергі келтіретін түрлі құралдарды пайдалануға да заңмен тыйым салынған. Оған арнайы рамкалар, пленкалар немесе жапсырмалар жатады.
Сондай-ақ нөмірсіз, жалған немесе талапқа сай келмейтін нөмірмен жүру де әкімшілік құқықбұзушылық болып есептеледі және ол үшін Әкімшілік құқықбұзушылық туралы кодекстің 590-бабына сәйкес жаза беріледі.
