Биылғы 21 мамырдан Business.enbek.kz порталында бірінші лек бойынша жаңа бизнес идеяларды іске асыруға гранттар алу үшін өтінімдер қабылдау басталады, деп хабарлайды F16.kzтілшісі Еңбек және халықты әлеуметтік қорғау министрлігіне сілтеме жасап.
Ведомстводан хабарлағандай, республика бойынша бірінші лекте барлығы 4 500 адамға грант беру жоспарланып отыр.
Өтінім беру үшін үміткерлер порталда тіркеліп, грант алу шарттарына сәйкестігіне тексеруден өтуі қажет. Сол сияқты, бизнес-жоспар үлгісін жүктеп алып, оны толтырып, порталға енгізуі керек. Өтініш нысанын толтырып, ЭЦҚ кілтімен қол қоюды да ұмытпаған жөн.
Интернетке немесе компьютерге қолжетімділік болмаған жағдайда, мансап орталықтарының өзіне-өзі қызмет көрсету аймақтарында, халыққа қызмет көрсету орталықтарында өтінім беруге болады.
Грант алу үшін бірқатар шартты сақтау қажет. Атап айтқанда, грант алуға төмендегі талаптарға сай келетін азаматтар үміткер бола алады:
– тіркелген жұмыссыздар;
– жеке кәсіпкерлер (тіркеу мерзімі үш жылға дейін).
Бұл ретте үміткер төмендегі әлеуметтік санаттардың бірінен болуы керек:
– мүгедектігі бар адамдар;
– қолданыстағы «қандас» мәртебесі бар адамдар;
– өңіраралық қоныс аударушылар;
– аз қамтылған отбасы мүшелері;
– көпбалалы отбасы мүшесі (жұбайы /зайыбы);
– мүгедектігі бар баланы тәрбиелеп отырған адам (жұбайы /зайыбы);
– асыраушысынан айырылуына байланысты жәрдемақы алатындар.
Үміткердің «Бастау Бизнес» жобасы бойынша кәсіпкерлік негіздерін оқығандығы туралы үш жылдан аспайтын мерзімдегі сертификаты болуға тиіс.
– Рәсімдердің ашықтығын қамтамасыз ету, адами факторды азайту, өтініш берушілерге ыңғайлы жағдай жасау мақсатында грант берудің бүкіл процесі электрондық форматқа ауыстырылды. Грант алуға өтінімдерді қабылдау бірыңғай терезе – «Business.enbek.kz» порталы арқылы жүзеге асырылады, – деп жазады дереккөзі.
Нұржан Кенжеұлы
Фото: pixabay.com
