Биылғы 10-20 қазан аралығында елімізде Қаржылық қауіпсіздік диктанты (FinIQ) өтеді. Бұл туралы Қаржылық мониторинг агенттігі мәлім етті, деп хабарлайды F16.kz.
Ондағы мақсат – қазақстандықтардың қаржылық сауаттылығын арттырып, алаяқтық тәуекелдері туралы ақпараттандыру жеке қаржыны қауіпсіз басқару мәдениетін қалыптастыру.
Диктантқа қатысушыларға шектеу жоқ. Мектеп жасындағы балалардан бастап қарияларға дейінгі аудитория қамтылады. Атап айтқанда, 6-11 сынып оқушылары, колледждер мен жоғары оқу орындарының студенттері, барлық салада жұмыс істейтін азаматтар, зейнеткерлер, мемлекеттік қызметшілер, құқық қорғау органдарының қызметкерлері және қаржылық мониторинг субъектілері.
Диктант онлайн форматта 20 сұрақтан тұратын тест түрінде өткізіледі. Уақыты – 25 минут. Тапсыру саны – шектеусіз. Платформа – AML академиясының сайты: https://amlacademy.kz/finiq
Дұрыс жауаптардың кемінде 50%-ын (10 және одан көп) жинаған қатысушыларға сертификат табысталады, ал 80% және одан да көп (16 және одан көп) дұрыс жауап бергендерге жеңімпаз дипломы беріледі. Әр өңірден диплом алған алғашқы 10 жеңімпаз естелік сыйлықтармен марапатталады.
Азаматтардың қаржылық сауаттылығы мен қырағылығын арттыру – ұлттық қаржылық қауіпсіздік стратегиясының маңызды бөлігі. Біз барлық қазақстандықтарды диктантқа қатысып, өз білімдерін тексеруге шақырамыз. Агенттік еліміздің барлық тұрғындарын жасына және қызмет саласына қарамастан бастамаға қосылып, қаржылық қауіпсіздік мәдениетін дамытуға өз үлесін қосуға үндейді. – деп жазды ШҚО бойынша экономикалық тергеп-тексеру департаменті.
