Қазақстан Премьер-министрі Олжас Бектенов Әзербайжан астанасы Баку қаласына жұмыс сапары аясында Түркі мемлекеттері ұйымына (ТМҰ) мүше елдер үкіметтері басшыларының кездесуіне қатысты, деп хабарлайды F16.kz.
Сапар барысында Үкімет басшысы Әзербайжан Президенті Ильхам Әлиевтің делегация басшыларымен ұжымдық қабылдауда болды. Кездесуде сауда-экономикалық ынтымақтастық пен бірлескен жобаларды дамыту мәселелері талқыланды. Олжас Бектенов Қазақстан Президенті Қасым-Жомарт Тоқаевтың сәлемін жеткізіп, екі ел арасындағы әріптестікті одан әрі нығайтуға дайын екенін атап өтті.
ТМҰ үкіметтері басшыларының екінші отырысында өңірлік және жаһандық сын-қатерлер жағдайындағы өзара іс-қимыл, сауда және инвестициялық байланыстарды кеңейту, көлік инфрақұрылымын дамыту, сондай-ақ Орта дәліздің әлеуетін арттыру мәселелері қаралды.
Бектенов өз сөзінде ТМҰ-ның экономикалық ынтымақтастықты нығайтудағы рөлі артып келе жатқанын айтты. Оның мәліметінше, 2025 жылдың қорытындысы бойынша Қазақстанның ұйымға мүше елдермен өзара сауда көлемі 12,9 млрд долларға жеткен.
2025 жылдың қорытындысы бойынша Қазақстанның Түркі мемлекеттері ұйымына мүше елдермен өзара сауда көлемі $12,9 млрд-қа жетті. Біз бірлестігіміздің бар мүмкіндіктерін пайдалана отырып, сауда-экономикалық және инвестициялық қатынастарды одан әрі тереңдетуге мүдделіміз, — деп атап өтті Олжас Бектенов.
Сонымен қатар тараптар сауда-өнеркәсіп ынтымақтастығын күшейту, цифрлық экономиканы дамыту, бірлескен өндірістер ашу және көлік-транзит бағыттарын кеңейту мәселелерін талқылады. Қазақстан Түркістандағы «Тұран» арнайы экономикалық аймағында бірлескен жобаларды жүзеге асыруға дайын екенін растады.
Көлік саласында Орта дәлізді дамытуға ерекше назар аударылып, Қазақстан мен Әзербайжан арасында тиісті үкіметаралық келісімге қол қою жоспарланып отыр.
Кездесу қорытындысы бойынша қатысушы елдер бірлескен мәлімдеме қабылдап, ұйым аясындағы ынтымақтастықты одан әрі дамытуға ниетті екенін растады.
