Кешелі бері Өскеменнің қоғамдық көліктерінде жол ақысын төлеу қиындық туғызды. Биыл ғана қолданысқа енгізілген Onay төлем жүйесі дұрыс жұмыс істемей, жолаушыларды әбден әбігерге салды, деп хабарлайды F16.kz.
Onay компаниясының басшылығы тұтынушылардан келеңсіздік үшін кешірім сұрап, жағдайды түсіндірді.
Жүргізіліп жатқан жұмыстарға байланысты таңертең мобильді қосымшаны пайдаланушылардың бір бөлігінде «Виртуалды карта» сервисін қолдану кезінде қысқа мерзімді шектеулер болды. Дегенмен жол ақысын төлеудің басқа түрлері: көлік карталары, QR, SMS, USSD арқылы және қолма-қол төлем де қалыпты режимде жұмыс істеп тұрды, – делінген хабарламада.
Компания басшылығы қолға алынған жаңғырту жұмыстары жолаушылар үшін жасалып жатқанын атап өтті.
Қосымшаны пайдалану ыңғайлы әрі функционалды болу үшін жаңартулар енгізілді. Уақытша қолайсыздықтар үшін кешірім сұраймыз және түсіністік танытқандарыңызға алғыс білдіреміз, – деп қосты Onay компаниясы.
