Сәтпаев даңғылы мен Жібек жолы көшесінің қиылысындағы кептеліс мәселесі келесі жылы шешілуге тиіс. Бұл туралы ШҚО әкімі Нұрымбет Сақтағанов Өскемен тұрғындарымен кездесу барысында айтты, деп хабарлайды F16.kz.
Жібек маталар комбинаты (КШТ) ауданының тұрғындары Сәтпаев даңғылындағы ұзын-сонар кептеліске жиі шағымданады. Қолайсыз ауа райы, қалың қар жауған күндері адамдар сағаттап жолда тұруға мәжбүр.
Оның себебі – көп деңгейлі жолайырық құрылысы.
Бұл жұмыстарды негізі 2027 жылдың соңында аяқтау жоспарланған. Алайда біз жұмысты тездетіп, келер жылы аяқтау жөнінде мердігермен сөйлестік, қазір Қаржы министрлігімен де жұмыс жүргізіп жатырмыз, — деп атап өтті облыс әкімі.
Айта кетейік, жолайрық құрылысы үш кезеңмен жүзеге асырылады. Қазір инженерлік желілерді алып тастау, ауыстыру жұмыстары аяқталған. Енді жол үстіндегі жұмыстар басталып, уақытша айналма және жобалық жолдар салынады.
Келер жылдың күзіне дейін бұл мәселені шешеміз, — деді Нұрымбет Сақтағанов.
Жаңа жолайрық екі деңгейлі болады деп жоспарланған: біріншісі – айналма жол, екіншісі – Сәтпаев пен Есенберлин даңғылдарына апаратын жол.
