Қазір облыс аумағында «Қауіпсіз жол» республикалық жедел-алдын алу іс-шарасы өтіп жатыр. Оның аясында патрульдік полиция күшейтілген режимге көшіп, көлік жүргізушілерін ерекше бақылауға алды, деп хабарлайды F16.kz.
Профилактикалық шара 15 қыркүйекте басталған. Алғашқы күні-ақ өскемендік тәртіп сақшылары 201 жол ережесін бұзу дерегін тіркеді.
Әсіресе, белгіленбеген жерден жолды кесіп өтпек болған тұрғындар өте көп. Ол көлік жүргізушісі үшін де, жаяу жүргінші үшін де өте қауіпті. Одан бөлек, қарсы жолаққа шығу, жаяу жүргіншілер өткелінде өткізбеген, рульде отырып телефонмен сөйлескен және қауіпсіздік белдігін тақпағандар да кездесті. Мұның бәрі адамның жеке бас тәртібінен басталады. Қауіпсіздік талаптарын елемеудің соңы қайғылы жағдайға әкеп соғуы мүмкін, — деді Өскемен қалалық Полиция басқармасы бастығының орынбасары Еркін Саттыбаев.
Жедел-профилактикалық іс-шара 30 қыркүйекке дейін жалғасады. Осы аралықта жол учаскелерінде рейд жүргізіліп, тәртіп бұзған жүргізушілер мен жаяу жүргіншілер жауапқа тартылады.
Полция қызметкерлері әр тұрғынға өте мұқият болып, жолдағы қауіпсіздік ережелерін қатаң сақтау керектігін еске салады.
