Өскемен тұрғыны синтетикалық есірткі затын өз еркімен құқық қорғау органдарына өткізгені үшін қаржылай сыйақыға ие болды, деп хабарлайды F16.kz.
Төлем облыс прокуратурасының бастамасымен жүзеге асырылып отырған «STOP есірткі!» пилоттық жобасы аясында берілді. Жобаның негізгі мақсаты – есірткіге қатысты заң бұзу жағдайларының алдын алу үшін тұрғындардың белсенділігін арттыру.
Жоба іске қосылған бір жылда оң нәтиже көрсеткен. Адамдардың хабарлаумен 12 қылмыстық іс қозғалып, заңсыз айналымнан шамамен 3 келі синтетикалық есірткі тәркіленген. Ал құқық қорғау органдарына көмек көрсеткен азаматтарға төленген сыйақының жалпы көлемі 3 миллион теңгеден асқан.
ШҚО прокуратура өкілдері тұрғындарды есірткі таратуға байланысты кез келген дерек туралы «102» нөміріне немесе 14 68, 8 771 659 53 22 сенім телефондарына хабарлауға шақырады.
Хабар берген азаматтың жеке деректері құпия сақталып, қауіпсіздігі қамтамасыз етіледі. Сондай-ақ расталған ақпарат үшін ақшалай сыйақы қарастырылған.
