Облыс орталығында жыл басынан бері, яғни небәрі бір ай ішінде есірткі таратумен айналысқан 2 әйел ұсталды, деп хабарлайды F16.kz.
Өскемен қаласы прокуратурасының мәліметінше, соңғы жылдары қалада қауіпті үрдіс белең алып, қылмыстық топтар әйелдерді курьер және «закладчик» ретінде пайдалануды жиілеткен.
Ресми статистикаға сүйенсек, 2024 жылы Өскемен қаласында есірткі сату фактілері бойынша 3 әйел ұсталса, 2025 жылы 7, ал 2026 жылдың алғашқы айында 2 әйел ұсталған.
Іс жүзінде соңғы екі жылда әйелдердің қатысуымен тіркелген қылмыстар саны екі есе өсті. 2026 жылдың басындағы көрсеткіштер де көңіл қуантпай тұр. Ұсталғандардың жасы да ерекше алаңдаушылық туғызады. Олардың арасында жеңіл табысқа келісіп, өз тағдырын өзі күйретіп жатқан жас қыздар да бар, — дейді прокуратура өкілдері.
Есірткі құралдарын тарату — ауыр қылмыс. Құқық қорғау органдары жасалған әрекеттің саралануына қарай заңмен 12 жылға дейін бас бостандығынан айыру жазасы көзделгенін еске салады.
