Шығыстың бас шаһарында Ұлттық киімдер күні ерекше аталып өтті. Maxi Mall сауда кешеніне жиналған жұртшылық «Біз – біртұтас Қазақстан халқы» атты ұлттық киімдер шеруін тамашалады, деп хабарлайды F16.kz.
Наурызнама онкүндігі аясында өңірде ұлттық құндылықтарды, қазақ халқының бай мұрасын насихаттауға арналған шаралар өтіп жатыр.
Мерекелік бағдарлама ұлттық киім киген қатысушылардың жарапазан айтып кірген шеруімен басталды. Артынша жергілікті дизайнерлер мен шеберлердің туындылары, әшейекей бұйымдары көпшілік назарына ұсылынған сән көрсетілімімен жалғасты.
Бүгін шараға мемлекеттік қызметкерлер, кәсіпкерлер мен шығармашылық адамдар жиналды. Қатысушылардың әрқайсы бір-біріне ұқсамайтын ерекше образдар, түрлі ұлттық киімдер ұсынып жатыр. Бұл мерекеге қатысуға өтінім бергендер саны көп болды, – деді облыстық мәдениет басқармасының басшысы Самат Қасенов.
Сондай-ақ жиналғандар Шығыс Қазақстан өнер музейі ұйымдастырған «Өткеннің өрнегі» көрмесі мен концерттік бағдарламаны тамашалап, кештің ерекше атмосферасын сезінді.
Мерекеге қойылымда киетін образдарымның бірін киіп келдім. Осындай ұлттық киімді кигенде өзге адамдар қызыға қарап, мақтау естіп жатамын. Сондықтан ұлттық костюмдерді күнделікті жиі кию керек деп ойлаймын, – деді драма және оперетта театрының актрисасы Татьяна Воронина.
Шараға жиналғандар «Ең үздік ұлттық образ», «Ең дәстүрлі образ», «Ең креативті образ», «Отбасылық образ» және «Ең үздік балалар костюмі» номинациялары бойынша сынға түсіп, арнайы сыйлықтар табысталды.
22 наурыз күні орталық алаңда Қазақстанның гиннестердің рекордтар кітабына ену үшін үлкен шара өтеді. Соған әрқайсыңызды қатысуға шақырамын. Наурыз мерекесін үлкен деңгейде өткіземіз деп сенемін, — деді Өскемен қаласының әкімі Алмат Ақышов.
Сондай-ақ қала әкімі шаралар 22 наурызға дейін жалғасатынын атап өтті.
