Өскеменде жаңа тергеу изоляторы, ал Қарағанды мен Жітіқарада жазасын өтеушілерге арналған тұрғын блоктар салынады. Бұл туралы Қылмыстық-атқару жүйесі комитетінің (ҚАЖК) ақпаратына сүйеніп «Курсив» жазды, деп хабарлайды F16.kz.
Былтыр қылмыстық-атқару жүйесінің төрт мекемесінде сегіз тұрғын блоктың құрылысы аяқталды. Алдағы уақытта Өскеменде жаңа тергеу изоляторын салу, Қарағандыда үш тұрғын блок, Жітіқарада бір тұрғын блок құрылысын жүргізу жоспарланған. Бұған қоса Алматыда жекеменшік инвестор есебінен кәмелетке толмағандарға арналған түзеу мекемесі салынып жатыр.
Ведомствоның мәлімдеуінше, еліміздегі түрмелердің дені 30-70 жылдары салынған, ескі. Сондықтан жаңғыртуды қажет етеді. Инфрақұрылымды жаңарту жұмысы кезең-кезеңмен іске асырылады және жергілікті билікпен бірлесіп қаржыландырылады.
Кейінгі жылдары елімізде кейбір санаттар үшін жарияланған амнистия есебінен сотталғандар саны азайып келеді. Қазір мемлекет бір сотталған адамға күніне шамамен 2 900 теңге жұмсайды. Бұл сомаға тамақ, киім, коммуналдық қызметтер және басқа да қажеттіліктер кіреді.
