Облыс орталығындағы көпірлердің барлығына техникалық тексеру жүргізіледі. Комиссия құрамына тәуелсіз сарапшы ұйым да тартылуы мүмкін, деп хабарлайды F16.kz.
Естеріңізге сала кетейік, өткен аптада ел ауызында «Шнайдер көпірі» аталып кеткен, Үлбінің үстінен өтетін көпірдің бір бөлігі опырылып түсті. Абырой болғанда зардап шеккендер болған жоқ. Былтыр ғана жөндеуден өткен нысан бірнеше күн бойы тоқтаусыз жауған жауын-шашынға шыдас берме алмаған көрінеді. Оның себебін арнайы комиссия анықтайды.
Осы жағдайдан кейін шаһар басшысы Алмат Ақышов қаладағы барлық көпірді тексеріп шығуға тапсырма берді.
Ол үшін Алматы қаласынан Бұқтырма су қоймасы арқылы өтетін көпірдің жобасын жасаған арнайы сарапшы ұйым тартылады.
Барлық көпір толықтай тексеріледі. Комиссия құрылды. Қазір «Шнайдер көпірін» тексеріп жатқан ұйым да осы комиссия құрамына енді. Балама пікірлер алу үшін тәуелсіз сарапшы ұйымды да тартуды көздеп отырмыз, — дейді қала әкімі.
